پیپلزپارٹی کا 8 یا 9 کو پاکستانی حکومت کے خلاف تحریک عدم اعتماد پیش کرنے کا اعلان

مقدس دفاع نیوز ایجنسی نے ایکس پریس کے حوالے سے نقل کیا ہے کہ پاکستان  پیپلزپارٹی کے سینئر رہنما خورشید شاہ نے لاہور میں صحافیوں سے غیر رسمی بات کرتے ہوئے کہا ہے کہ 8 یا 9 کو وزیراعظم عمران خان کے خلاف تحریک عدم اعتماد پیش کردیں گے۔  پیپلز پارٹی کے مرکزی رہنما خورشید شاہ کا کہنا تھا کہ ریاست کو بچانے کے لئے اب عمران خان کو گھر جانا ہوگا،  ہمارے نمبر پورے ہیں تبھی تو میدان میں آئے ہیں، ہماری کوشش ہوگی ایمپائر نیوٹرل ہو جائے۔خورشید شاہ نے انکشاف کیا کہ ہمارے پاس نمبرز پورے ہوگئے ہیں، 8 یا 9 مارچ کو وزیراعظم کے خلاف تحریک عدم اعتماد لا رہے ہیں، اسپیکر قومی اسمبلی کے خلاف بھی عدم اعتماد پیش کریں گے، اور ہم  جس کے خلاف بھی تحریک عدم اعتماد پیش کریں گے وہ کامیاب ہوگی۔