بلوچستان میں مسلح دہشت گردوں نے فائرنگ کرکے 11 کان کن مزدوروں کو شہید کردیا

مقدس دفاع نیوز ایجنسی کی رپورٹ کے مطابق پاکستان کے صوبہ بلوچستان کے ضلع بولان کے علاقے مچھ میں مسلح وہابی دہشت گردوں  نے  ہزارہ سے تعلق رکھنے والے 11 شیعہ کان کنوں کو اغوا کرنے کے بعد فائرنگ کرکے  شہید کردیا۔

اطلاعات  کے مطابق بلوچستان کے ضلع بولان کی تحصیل مچھ  کے علاقے گشتری میں ہفتے اور اتوار کی درمیانی شب  مسلح وہابی دہشت گرد کوئلے کی کان میں کام کرنے والے ہزارہ مزدوروں کو اغوا کرکے پہلے پہاڑوں پر لے گئے اور پھر ان پر فائرنگ کردی۔ واقعہ کے بعد مسلح وہابی دہشت گرد فرار ہوگئے۔

ذرائع کا کہنا ہے کہ واقعے کی اطلاع ملتے ہی پولیس، انتظامیہ، اور سکیورٹی فورسز کی بھاری نفری موقع پر پہنچ گئی۔ واقعہ میں کم از کم 11 کان کن ہلاک  ہوگئے ہیں، لاشوں کو مچھ کے سرکاری اسپتال منتقل کردیا گیا ہے۔

ڈپٹی کمشنر بولان مراد کاسی کا کہنا ہے کہ واقعے میں 4 افراد زخمی بھی ہیں جن کا علاج جاری ہے، کان کنوں کی میتیں مچھ سے لانے کے لئے ایمبولینسیں کوئٹہ سے روانہ ہوگئی ہیں۔

وزیر اعلیٰ بلوچستان جام کمال نے مچھ میں وہابی دہشت گردی کی مذمت اور جانی نقصان پر اظہار افسوس کرتے ہوئے کہا کہ دہشت گردوں کو جلد کیفر کردار تک پہنچائیں گے، دہشت گردوں کے خلاف گھیرا مزید تنگ کیا جائے گا۔