مقدس دفاع نیوز ایجنسی کی بین الاقوامی رپورٹر رپورٹ کے مطابق افغان چیف ایگزیکٹیو ڈاکٹر عبداللہ عبداللہ نے بدھ کی شام کابل میں بین الاقوامی امن کانفرنس کی اختتامی تقریب سے خطاب میں دہشت گردی کے خلاف مہم کے لئے علاقائی اور عالمی اتفاق و مفاہمت کی ضرورت پر زور دیا۔
انھوں نے کہا کہ افغانستان نے دہشت گردی کے خلاف جنگ میں بہت زیادہ قربانیاں دی ہیں۔ انھوں نے کہا کہ افغانستان دہشت گردی کے خلاف جنگ میں فرنٹ لائن پر ہے۔
افغان چیف ایگزیکٹیو نے کہا کہ علاقے کے ملکوں کے سامنے دہشت گردی کے خلاف جنگ میں تعاون کے علاوہ اور کوئی راستہ نہیں ہے۔
انھوں نے اسی کے ساتھ دہشت گردی مخالف مہم میں عملی اقدامات اور انٹیلیجنس معلومات کے تبادلے کی ضرورت پر بھی زور دیا۔
ڈاکٹر عبداللہ عبداللہ نے کہا کہ افغان حکومت امن پسند ہے اور میزبان ملکوں سے افغان مہاجرین کی باعزت واپسی چاہتی ہے۔
قابل ذکر ہے کہ کابل میں بین الاقوامی امن کانفرنس بدھ کی صبح افغان صدر اشرف غنی کے خطاب سے شروع ہوئی تھی۔ افغان صدر نے اپنے خطاب میں طالبان گروہ کے ساتھ غیر مشروط مذاکرات کے لئے اپنی حکومت کی آمادگی کا اعلان کیا تھا۔
اس کانفرنس میں اقوام متحدہ اور دنیا کے بیس ملکوں کے نمائندوں نے شرکت کی۔ کانفرنس کے لئے کابل میں سخت حفاظتی انتظامات کئے گئے تھے۔
پیغام کا اختتام/