مقدس دفاع نیوز ایجنسی کی رپورٹ کے مطابق، اقوام متحدہ میں مستقل امریکی مندوب نکی ہیلی نے سی بی این ٹی وی سے گفتگو میں ایران پر اس بات کا الزام عائد کرنے کے بعد کہ اس نے اپنے آئندہ اقدام سے ایٹمی معاہدے پر دستخط کرنے والے ملکوں کو ڈرایا ہے، ایران کے ساتھ نئے ایٹمی معاہدے پر مذاکرات کے لئے اپنے ملک کی آمادگی کا اعلان کیا ہے۔
ایران کی وزارت خارجہ کے ترجمان بہرام قاسمی نے بدھ کے روز اس بات پر تاکید کرتے ہوئے کہ مذاکرات کے لئے امریکی حکام کے قول و فعل پر ہرگز کوئی اعتماد نہیں کیا جا سکتا، انھیں مشورہ دیا کہ وہ دھونس و دھمکی کے ساتھ توسیع پسندی اور خود سرانہ رویہ اختیار کر کے ایران کے ساتھ مذاکرات کا خیال ہمیشہ کے لئے اپنے دل و دماغ سے نکال دیں اور دوبارہ شکست خوردہ تجربہ کرنے کی کوشش نہ کریں۔ترجمان وزارت خارجہ نے کہا کہ ایران کی مہذب ، شجاع اور تاریخ ساز قوم نے اپنی قابل فخر تاریخ میں اپنی تہذیب و ثقافت اور عقل و منطق کا مظاہرہ کرتے ہوئے ہمیشہ دھمکی کا جواب دھمکی اور عزت و احترام کا جواب عزت و احترام سے دیا ہے اور وہ تسلط و توسیع پسندی اور دباؤ نیز دھونس ودھمکی کے مقابلے میں اپنے ملک کی آزادی و ارضی سالمیت، نیز اپنے حقوق کے دفاع و تحفظ میں کبھی کوئی کوتاہی نہیں برتے گی۔