امریکی وفد کا پاکستان کا ہنگامی دورہ

مقدس دفاع نیوز ایجنسی کی بین الاقوامی رپورٹر رپورٹ کے مطابقامریکی وفد نے گزشتہ روزپاکستان کے وفاقی وزیر داخلہ احسن اقبال اور سیکریٹری خارجہ تہمینہ جنجوعہ سے الگ الگ ملاقاتیں کیں۔ وزیرداخلہ احسن اقبال نے امریکی وفد پر زور دیا کہ پاک امریکا تعلقات کی بنیاد سیکیورٹی کیساتھ ساتھ ترقی میں شراکت داری کی بنیاد پر بھی ہونی چاہئیں۔

وزیرداخلہ احسن اقبال نے کہا کہ امریکا اور پاکستان کے مابین دہشتگردی کو شکست دینے کیلیے ہم آہنگی نہایت اہم ہے۔

ترجمان دفتر خارجہ کے مطابق لیزا کرٹس نے پاکستان کے ہنگامی دورے کے دوران سیکریٹری خارجہ تہمینہ جنجوعہ سے بھی پاک امریکہ تعلقات اور دوطرفہ تعاون کے امور پر تبادلہ خیال کیا۔

واضح رہے کہ امریکی وفد نے ایسے موقع پر پاکستان کا ہنگامی دورہ کیا ہے کہ جب ایک ہفتہ قبل امریکا نے پیرس میں فنانشل ٹاسک فورس کے اجلاس میں پاکستان کودہشتگردوں کیلیے مالی معاونت کرنیوالے ممالک کی واچ لسٹ میں رکھنے کی قرارداد پیش کی تھی۔ پاکستان کو اس فہرست میں شامل نہیں کیا گیا تاہم رپورٹس کے مطابق پاکستان کو جون تک مہلت دی گئی ہے جس کے بعد معاملے کا ازسر نو جائزہ لیا جائیگا۔

پاکستان اورامریکہ کے تعلقات امریکی صدر ٹرمپ کی جانب سے پاکستان میں دہشتگردوں کے خفیہ ٹھکانے ہونے کے الزامات کے بعد کشیدہ ہو گئے اور پاکستان نے امریکی سفیر کو وزارت خارجہ میں طلب کر کے اپنا احتجاج ریکارڈ کرایا۔