امریکہ کی جانب سے شامی مسلمانوں کی نسل کشی

مقدس دفاع نیوز ایجنسی کی بین الاقوامی رپورٹر رپورٹ کے مطابق لاہور میں مختلف وفود سے گفتگو کرتے ہوئے صاحبزادہ حامد رضا کا کہنا تھا کہ شام میں بیرونی مداخلت فساد کا سبب ہے، امریکہ اسرائیل کو خطے کا تھانیدار بنانے کے لئے مشرق وسطی کے مسلم ممالک کو تباہ کر رہا ہے، عالمی سازشوں کے ذریعے وحدت امت کو پارہ پارہ کیا جا رہا ہے۔

فلسطین، کشمیر اور برما میں مسلمانوں کی نسل کشی کی جا رہی ہے، عالم اسلام قیادت کے فقدان کا شکار ہے۔

دوسری جانب جماعت اہلسنت پاکستان کے مرکزی امیر علامہ مظہر سعید کاظمی نے اعلان کیا ہے کہ شام میں امریکہ کی جانب سے شامی مسلمانوں کی نسل کشی کی جا رہی ہے، عالمی امن کے ٹھیکیدار شام میں بہتے لہو پر خاموش تماشائی بنے ہوئے ہیں، اقتدار اور وسائل پر قبضے کی جنگ میں شام کو کھنڈر بنایا جا رہا ہے، اسلامی ممالک کے سربراہان شام میں بھڑکتی آگ کو بجھانے کے لئے فعال کردار ادا کریں۔

انہوں نے کہا کہ شام کی خانہ جنگی عالمی گریٹ گیم کا حصہ ہے، شام میں جاری قتل عام کے خلاف جمعہ 2 مارچ کو ملک بھر میں یوم احتجاج منایا جائے گا، جماعت اہلسنت 2 مارچ کو ملک بھر میں شامی بچوں کے قتل عام پر احتجاجی مظاہرے کرے گی اور جمعہ کے اجتماعات میں مذمتی قراردادیں منظور کی جائیں گی۔

 انہوں نے کہا کہ شام میں مستقل اور پائیدار امن کے قیام کے لئے اقوام متحدہ کی جنگ بندی کی قرارداد کافی نہیں ہے، شام کی خانہ جنگی کا مستقل حل تلاش کیا جائے،  پاکستانی مسلمان، شام کے مظلوم مسلمانوں کے ساتھ یکجہتی کا اظہار کرتے ہیں۔

پیغام کا اختتام/