اپوزیشن خوب جلسے کرے، مگر احتساب پر کوئی سمجھوتہ نہیں ہوگا: عمران خان

مقدس دفاع نیوز ایجنسی کی رپورٹ کے مطابق، اسلام آباد روانگی سے قبل لاہور میں میڈیا سے گفتگو میں مریم نواز کا کہنا تھا کہ پاکستان کے عوام مہنگائی، بے روزگاری، لاقانونیت اور حکومت کی نااہلی اور نالائقی سے تنگ آ چکے ہیں۔

انہوں نے دعوی کیا کہ لوگ پی ڈی ایم اور نواز شریف میں اپنی نجات دیکھ رہے ہیں اور بقول ان کے تحریک ختم نہیں ہوسکتی، یہ تحریک حکومت کو گھر بھیج کر ہی دم لے گی۔
قابل ذکر ہے کہ پاکستان کی اپوزیشن جماعتوں کے اتحاد پی ڈی ایم نے تیرہ دسمبر کو لاہور کے مینار پاکستان پر جلسے کا اعلان کر رکھا ہے۔
ادھر پاکستان کے وزیر اعظم عمران خان نے اپوزیشن پر تصادم کی سیاست کرنے کا الزام عائد کرتے ہوئے کہا ہے کہ، اپوزیشن مینار پاکستان پر دس جلسے کر لے، حکومت کو کوئی فرق نہیں پڑے گا۔
انہوں نے اپنی حکومت اور پارٹی کے ترجمانوں کے آن لائن اجلاس سے خطاب کرتے ہوئے کہا کہ میری حکومت بھی چلی جائے تب بھی احتساب پر سمجھوتا نہیں کروں گا۔
انہوں نے کہا کہ حزب اختلاف کی جماعتیں اپنا کرپشن بچانے کے لیے اب عوام کی زندگیاں خطرے میں ڈال رہی ہیں۔