افغان صوبے بغلان میں کاربم دھماکے کے نتیجے میں 16 اہلکار ہلاک اور زخمی

مقدس دفاع نیوز ایجنسی نے طلوع کے حوالے سے نقل کیا ہے کہ افغانستان کے صوبے بغلان میں ملٹری بیس کے قریب کاربم دھماکے کے نتیجے میں 16 اہلکار ہلاک اور متعدد زخمی ہوگئے ہیں۔ اطلاعات کے مطابق صوبے بغلان میں ملٹری بیس کے قریب کاربم دھماکے کے نتیجے میں 6 سیکیورٹی اہلکار ہلاک اور 10 زخمی ہوگئے، دھماکے کے بعد طالبان کی جانب سے اندھادھند فائرنگ شروع کردی گئی تاہم سکیورٹی فورسز کی بروقت کارروائی کے نتیجے میں حملہ ناکام بنادیا گیا۔

ادھر کار بم دھماکے کے بعد طالبان نے بغلان سمنگن ہائی وے کو مائنز لگاکر عام ٹریفک کے لیے بند کردیا تاہم مائنز ہٹانے کا کام شروع کردیا گیا ہے۔

افغان آرمی کمانڈر کے مطابق دھماکے میں ملٹری بیس کو شدید نقصان پہنچا ہے اور حملے میں متعدد اہلکار زخمی بھی ہوئے ہیں جب کہ طالبان دہشت گردوں نے حملے کی ذمہ داری قبول کرلی ہے۔