یوسف رضا گیلانی پر بیرون ملک جانے پر پابندی

مقدس دفاع نیوز ایجنسی کی بین الاقوامی رپورٹر رپورٹ کے مطابق، پاکستان کے سابق وزیر اعظم یوسف رضا گیلانی کو امیگریشن کاؤنٹر پر ایف آئی اے حکام نے روکا کیونکہ نیب میں کیسز کی وجہ سے ان کا نام ای سی ایل میں شامل تھا۔

بیرون ملک جانے سے روکے جانے پر ردعمل دیتے ہوئے یوسف رضا گیلانی کا کہنا تھا میں پاکستان چھوڑنے کا تصور تک نہیں کرسکتا، ڈیڑھ ماہ قبل ایشیا پیسفک کانفرنس میں شرکت کیلئے نیپال گیا، آج براستہ بنکاک جنوبی کوریا جارہا تھا کہ مجھے روک کر بنیادی انسانی حقوق کو پامال کیا گیا حالانکہ سیؤل میں ہونے والی ورلڈ سمٹ میں روانگی کے حوالے سے نیب جج کو آگاہ کردیا تھا۔

سابق وزیر اعظم نے کہا دفتر خارجہ اور محکمہ داخلہ میرے بیرون ملک دوروں سے آگاہ تھے، میں مسلسل عدالتوں میں پیش ہوکرالزامات کا سامنا کر رہا ہوں، پی ٹی آئی حکومت بنیادی انسانی حقوق کی دھجیاں اڑانا بند کرے اور انتقام کا راستہ ترک کرے کیونکہ یہ خود عمران خان کے لیے اچھا نہیں ہے۔

یوسف رضا گیلانی نے مزید کہا کہ آزادی اظہار کا گلا گھونٹ کر نیا پاکستان تعمیر نہیں کیا جاسکتا۔