ہندوستان کے وزیراعظم کے دورہ فلسطین کا اعلان

مقدس دفاع نیوز ایجنسی کی بین الاقوامی رپورٹر رپورٹ کے مطابق، ہندوستان کے وزیر اعظم نریندر مودی اس ملک کے پہلے ایسے رہنما ہوں گے جو فروری میں فلسطین کا دورہ کریں گے۔

ہندوستان کے میڈیا ذرائع کے مطابق وزیر اعظم نریندر مودی فروری میں چار روزہ دورے پر فلسطین، متحدہ عرب امارات اور عمان جائیں گے۔ اس سے قبل کسی بھی ہندوستانی وزیراعظم نے فلسطین کا دورہ نہیں کیا جبکہ نریندر مودی پہلے وزیراعظم ہوں گے جو طے شدہ پروگرام کے مطابق فلسطین جائیں گے۔

رواں ماہ جنوری میں غاصب صیہونی حکومت کے وزیر اعظم بنیامین نیتن یاہو نے ہندوستان کا چھے روزہ  دورہ کیا تھا جس پر اس ملک کے مختلف علاقوں میں شدید احتجاجی مظاہرے کئے گئے تھے اور اسرائیل کا پرچم نذرآتش کیا گیا تھا۔

واضح رہے کہ مقبوضہ بیت المقدس کو اسرائیل کا دارالحکومت بنانے کے امریکی اعلان کے بعد اقوام متحدہ کی جنرل اسمبلی میں پیش کی جانے والی قرارداد کے بارے میں ہندوستان نے امریکہ کے فیصلے کی مخالفت کرتے ہوئے مقبوضہ بیت المقدس کو اسرائیل کا دارالحکومت تسلیم کرنے سے انکار کر دیا تھا۔