آئی آر جی سی کا دشمن کو دوٹوک انتباہ؛ فوری طور پر لبنان سے پسپائی اختیار کرو
دفاع پریس کے دفاعی اور سیکیورٹی گروپ کے مطابق، آئی آر جی سی نے لبنان کے حالیہ واقعات کے حوالے سے ایک بیان جاری کیا ہے۔
بیان کا مکمل متن درج ذیل ہے:
یہ سرزمین اب بھی غاصب صیہونی حکومت کی وحشیانہ جارحیت کی زد میں ہے۔ بین الاقوامی اداروں، مختلف ممالک اور دنیا کی اقوام کی جانب سے مخالفت اور نفرت کے اظہار کا تل ابیب کے خون آشام حکمرانوں کے طرزِ عمل پر کوئی اثر نہیں پڑا اور امن کے قیام کے دعوے کے ساتھ متکبر امریکی حکومت کی مداخلتوں کا نتیجہ جرائم اور نسل کشی میں اضافے کے سوا کچھ نہیں نکلا۔
بیان میں مزید کہا گیا ہے:
صیہونی دشمن کی بزدل اور ناتواں فوج اپنے تمام تر عسکری ساز و سامان کے باوجود محاذوں پر ہونے والی شکستوں کا ازالہ غیر فوجی شہریوں کے قتلِ عام اور گھروں، ہسپتالوں اور سکولوں کی تباہی کے ذریعے کرتی ہے۔ یہ ایک نسل پرست حکومت ہے جس نے امریکہ اور یورپی حکومتوں کی لامحدود حمایت کے باوجود اپنی شرمناک عمر کے دوران کسی ایک بھی مقبوضہ گاؤں کی عوام کا دل نہیں جیت پائے۔ اس کی واحد مہارت تباہ شدہ سرزمینوں پر حکومت کرنا ہے اور ہم روزانہ فلسطین اور لبنان کی مظلوم عوام کے گھروں کی تباہی اس جارح حکومت کے ہاتھوں دیکھ رہے ہیں۔
اس بیان کے ایک اور حصے میں اس بات پر زور دیا گیا ہے کہ خطے کی اقوام لبنان کی عوام کو تنہا نہیں چھوڑیں گی۔ بیان میں کہا گیا ہے:
لبنان کے لوگ ہرگز یہ اجازت نہیں دیں گے کہ غاصب حکومت جو کچھ جنگ کے میدان میں حاصل نہ کر سکی، وہ امریکہ کی طفل کُش حکومت کی حمایت سے مسلط کردہ معاہدوں کے ذریعے حاصل کر لے۔ علاقائی جنگ میں جنگ بندی قبول کرنے کے لیے ہماری اولین شرط تمام محاذوں، بالخصوص لبنان میں جنگ بندی تھی۔
دشمن کو فوری طور پر لبنان کے لوگوں کے خلاف اپنی جارحانہ کارروائیاں بند کرنی ہوں گی اور مقبوضہ لبنانی علاقوں کو خالی کر کے بین الاقوامی سرحدوں کے پیچھے فوراً واپس جانا ہوگا نیز لبنان کی ارضی سالمیت کو تسلیم کرنا ہوگا۔
بیان کے اختتام میں کہا گیا ہے:
لبنان کی قوم امتِ مسلمہ کا فخر اور خطے کی اقوام کی عزت و شرافت کی علامت ہے۔ ہم پوری طاقت اور خلوص کے ساتھ ان کی حمایت جاری رکھیں گے اور لبنان کے مقبوضہ علاقوں سے پسپائی اختیار کیے بغیر خطے میں کسی قسم کا پائیدار امن قائم نہیں ہو سکے گا۔
