بسیج کو طاقت کا سرچشمہ بنانا شہید سلیمانی کا عظیم ترین کارنامہ تھا

دفاع پریس کے دفاعی اور سیکیورٹی گروپ کے مطابق، حضرت خاتم الانبیاء (ص) سینٹرل ہیڈکوارٹر کے کمانڈر میجر جنرل علی عبداللہی نے بسیج مستضعفین آرگنائزیشن کے سابق سربراہ شہید میجر جنرل غلام رضا سلیمانی کے گھر جا کر ان کے اہلِ خانہ سے ملاقات اور تعزیت کی۔

ملاقات کے آغاز میں میجر جنرل عبداللہی نے شہید کمانڈر کی یاد کو خراجِ عقیدت پیش کرتے ہوئے کہا کہ تیسری مسلط کردہ جنگ کے دوران امریکی-صیہونی دہشت گرد حملے میں ان کی شہادت، ایران کی عسکری اور ایمانی تاریخ کا ایک درخشاں باب ہے۔ انہوں نے کہا کہ اس وحشیانہ جرم نے نہ صرف ایرانی عوام، خصوصاً بسیج فورس کے عزم کو کمزور نہیں کیا بلکہ قومی اتحاد، بیداری اور عوامی بسیج کی قوت کو مزید مضبوط کیا۔

انہوں نے شہید غلام رضا سلیمانی کی شخصیت اور اخلاقی اوصاف کا ذکر کرتے ہوئے کہا کہ اندرون ملک بحرانوں اور بیرون ملک سازشوں کے دوران ان کا صبر، تحمل اور وقار انقلابی نظام کے مینیجرز کے لیے ایک دائمی مثال ہے۔ ان کے بقول، شہید کمانڈر کی تنظیمی قیادت اخلاق، عسکری نظم و ضبط، ولایت سے وابستگی اور شعوری انقلابی فکر کی عملی تصویر تھی۔ انہوں نے بسیج کو عوامی ہیڈکوارٹر کے طور پر رہبرِ انقلاب کے وژن اور "انقلاب کے لیے دوسرا قدم بڑھانے کے مؤقف" کے مطابق آگے بڑھایا اور کبھی بھی انقلابی اصولوں اور قومی مفادات کے درمیان فاصلے کو قبول نہیں کیا

میجر جنرل عبداللہی نے کہا کہ شہید سلیمانی کی سب سے بڑی خدمت یہ تھی کہ انہوں نے بسیج کو صرف ایک آپریشنل ادارہ نہیں رہنے دیا بلکہ اسے علمی، فنی، طبی، سیکیورٹی اور ثقافتی میدانوں میں قومی طاقت پیدا کرنے والے عظیم مرکز میں تبدیل کر دیا۔ انہوں نے منظم منصوبہ بندی کے ذریعے بسیج کو ایک ٹیلنٹ بیسڈ کمیونٹی اور ایران کی حمایت کے لیے ایک خصوصی قومی نیٹ ورک کی شکل دی۔

انہوں نے مزید کہا کہ جن لوگوں نے دہشت گردی کے ذریعے اس الٰہی راستے کو روکنے کی کوشش کی، آج وہ دیکھ رہے ہیں کہ شہید کے پاکیزہ خون اور ان کے ساتھیوں کی جدوجہد کی بدولت بسیج اور مزاحمتی محاذ پہلے سے زیادہ مضبوط اور ایکٹیو ہو چکے ہیں۔ انہوں نے تاکید کی کہ شہید سلیمانی کا راستہ ایران کی مسلسل طاقت اندوزی کا راستہ ہے اور حضرت خاتم الانبیاء سینٹرل ہیڈکوارٹر دیگر مسلح افواج اور بصیرت رکھنے والے انقلابی بسیجی، رہبرِ معظم اور مسلح افواج کے سپریم کمانڈر آیت اللہ سید مجتبی حسینی خامنہ ای (مدظلہ العالی) کی ہدایات کے تحت شہید کمانڈرز کی اسی ولایت پذیر حکمتِ عملی کو جاری رکھیں گے تا کہ ایران کی آزادی، علاقائی سالمیت، قومی حاکمیت، سلامتی اور انقلابِ اسلامی کے اہداف کا دفاع جاری رکھا جا سکے۔

اس ملاقات میں شہید میجر جنرل غلام رضا سلیمانی کے اہلِ خانہ نے میجر جنرل عبداللہی اور ان کے ہمراہ آنے والے وفد کی آمد پر شکریہ ادا کرتے ہوئے اس عزم کا اظہار کیا کہ وہ ولایت کے سائے میں شہید کے راستے کو جاری رکھیں گے۔