دشمن کو مزید شکستوں کا تلخ ذائقہ چکھائیں گے، چیف آف سٹاف مسلح افواج

دفاع پریس کے دفاعی اور سیکیورٹی گروپ کے مطابق، مسلح افواج کے چیف آف سٹاف اور حضرت خاتم الانبیاءؐ سینٹرل ہیڈکوارٹر نے ہفتۂِ دفاعِ مقدس کی آمد کے موقع پر ایک بیان جاری کیا۔

اس بیان کا متن درج ذیل ہے

بسم اللہ الرحمن الرحیم

22 ستمبر اسلامی انقلاب کی شاندار تاریخ میں ایک عظیم واقعے کی یاد دلاتا ہے؛ل۔ یہ وہ دور تھا جب ایرانی مزاحمت کار قوم نے پختہ ایمان اور اتحادِ کلمہ پر بھروسہ کرتے ہوئے آٹھ سالہ دفاعِ مقدس میں بعثی دشمنوں کی فوجی جارحیت اور مشرق و مغرب کی سپر پاورز کے مختلف سیاسی، سیکیورٹی اور معاشی دباؤ کے مقابلے میں ایک ناقابلِ نفوذ دیوار قائم کر دی اور دنیا کے فوجی اور اسٹریٹجک میدان میں تمام روایتی حساب کتاب کو درہم برہم کرتے ہوئے، اپنے عزیز وطن کی مقدس سرزمین کا ایک انچ بھی کھوئے بغیر، عالمی سامراج اور امریکی نظامِ تسلط کے نیابتی عناصر یعنی عراق کی بعثی حکومت کے خلاف ناقابلِ تلافی شکست مسلط کر دی۔

آٹھ سالہ دفاعِ مقدس کے سبق آموز اور قیمتی تجربات نے ملک کی بے مثال دفاعی طاقت اور اقتدار میں اضافے اور تکامل کے عمل کو ’’طاقتور ایران‘‘ کی سمت گامزن کیا اور اس کے نتیجے میں مغرور امریکہ اور جرائم پیشہ اور طفل کُش صیہونی حکومت نے 12 روزہ مسلط کردہ جنگ اور جنگِ رمضان میں، مبعوث ایرانی قوم اور اس کے مسلح افواج میں موجود بہادر اور شجاع فرزندوں کے سامنے گھٹنے ٹیک دیے اور سرِ تسلیم خم کر دیا۔

موجودہ حالات میں اسلامی جمہوریہ ایران کی مسلح افواج نے اللہ تعالیٰ پر توکل، بہادر عوام کی حمایت، مقامی علم و دانش اور دفاعی صنعتوں اور جدید فوجی ٹیکنالوجیز میں اسٹریٹجک خود کفالت پر بھروسہ کرتے ہوئے مغربی ایشیاء میں امریکہ اور جعلی صیہونی حکومت کے فوجی اور سیکیورٹی بنیادی ڈھانچے اور اسٹریٹجک مفادات کو بھاری نقصانات پہنچا کر سیکیورٹی کے توازن کو امتِ مسلمہ اور معزز ایرانی قوم کے حق میں تبدیل کر دیا ہے جس کی نمایاں مثال آبنائے ہرمز کا ایرانی انتظامات کے تحت کنٹرول سنبھال لینا، زوال پذیر، ہالی ووڈ پر مبنی اور دہشت گرد امریکی حکومت کی کھوکھلی فوجی ہیبت کا مٹی میں مل جانا اور طفل کُش صیہونی فوج کو ذلیل و رسوا کرنا ہے۔

ایرانی قوم اللہ کے فضل سے، ایمان پر بھروسہ اور قومی تخلیقی صلاحیتوں کا استعمال کرتے ہوئے امریکی-صیہونی دشمنوں کے وجود پر کاری ضربیں لگانے کے بعد، دشمن کے ہائبرڈ حملوں بالخصوص معاشی، ادراکی اور میڈیا جنگوں کے مقابلے میں بھی پوری طاقت کے ساتھ عالمی سامراج کے سیاہ ریکارڈ میں ایک اور شکست درج کرے گی۔

مسلح افواج کے چیف آف سٹاف اور حضرت خاتم الانبیاءؐ سینٹرل ہیڈکوارٹر، اسلامی انقلاب کے عظیم رہنما حضرت امام خمینیؒ اور امت کے شہید قائد حضرت امام خامنہ ایؒ کی یاد کو خراجِ عقیدت پیش کرتے ہوئے، آٹھ سالہ دفاعِ مقدس اور دوسری اور تیسری مسلط کردہ جنگوں کے تمام عظیم شہداء، ایثار گر افراد اور ان کے معزز خاندانوں کو خراجِ تحسین پیش کرتے ہیں اور اسلامی انقلاب کے رہبرِ معظم حضرت آیت اللہ سید مجتبیٰ حسینی خامنہ ای مدظلہ العالی کے ساتھ اپنے عہد کی تجدید کرتے ہوئے معزز ایرانی قوم کو یقین دلاتے ہیں کہ اسلام کے تمام سپاہی، فوج، آئی آر جی سی، وزارتِ دفاع، فراجا (پولیس) اور بسیج (رضاکار) کے اہلکار اور ملک کے سرحدی محافظ قومی مفادات، عوام کے حقوق اور عزیز ایران کی علاقائی سالمیت کے تحفظ کے معاملے میں دشمن کے سامنے ہرگز پسپائی اختیار نہیں کریں گے اور جارحین اور ایرانی قوم کے بدخواہوں، بالخصوص امریکی اور صیہونی دشمنوں اور ان کے اتحادیوں کو مزید شکستوں کا تلخ ذائقہ چکھائیں گے۔