امریکہ کلنگ کی پہاڑی یا کسی بھی دیگر مقام پر حملہ کرے تو ہم اس کا مقابلہ کریں گے، جنرل محبی
آئی آر جی سی کے ترجمان جنرل حسین محبی نے دفاعِ پریس نیوز ایجنسی کے دورے کے دوران دفاعی اور سیکیورٹی گروپ کے نمائندے سے گفتگو کرتے ہوئے کلنگ پہاڑی پر حملے اور بنیادی ڈھانچے کو تباہ کرنے کی دھمکیوں سے متعلق امریکی حکّام کے بیانات کے بارے میں کہا: ٹرمپ کو مسلسل دھمکیاں دینے کی عادت ہے اور وہ بھول جاتا ہے کہ اس سے قبل بھی دھمکیاں دی گئی تھیں لیکن وہ انہیں عملی جامہ پہنانے میں کامیاب نہیں ہو سکا اور اب ایک بار پھر نئی دھمکیاں دے رہا ہے۔
جنرل محبی نے مزید کہا: اس خاص معاملے میں اگر امریکہ، ایران کے کسی بھی مقام پر حملہ کرنا چاہے، نہ صرف کلنگ پہاڑی پر اور نہ ہی صرف اس مقام پر جس پر حملے کی اس نے دھمکی دی ہو، تو ہم امریکہ کے حملے کا مقابلہ کرنے کے لیے مکمل طور پر تیار ہیں اور اس سے قبل بھی امریکہ نے ہمارے مقابلہ کرنے سے جو تجربات حاصل کیے ہیں اور جن کے نتیجے میں در حقیقت امریکہ کو اپنے مقاصد تک پہنچنے سے روکا گیا، وہ تجربات ایک بار پھر امریکہ کے لیے دہرائے جائیں گے۔
انہوں نے مزید کہا: میں امریکی حکمرانوں اور حکومتی عہدیداروں کو مشورہ دیتا ہوں کہ وہ ان اقدامات کو دوبارہ نہ دہرائیں جنہیں وہ پہلے آزما چکے ہیں اور جن میں پہلے ہی ناکامی کا سامنا کر چکے ہیں کیونکہ آزمائی گئی چیز کو دوبارہ آزمانا غلطی ہے اور جو شخص کسی چیز کو ایک بار آزما چکا ہو اور دوبارہ اسے آزمانا چاہے تو اسے پچھتانا پڑے گا۔
جنرل محبی نے کہا: ہم ان تمام شعبوں میں جن کے بارے امریکہ یہ وہم رکھتا ہے کہ وہ ان مقامات اور علاقوں کو نشانہ بنا کر اپنے مقاصد حاصل کر سکتا ہے، اس وہم کو ہمیشہ کی طرح خاک میں ملا دینے اور اپنی میدانی صلاحیت کی حقیقت امریکہ کو دکھانے کے لیے تیار ہیں۔
جنرل محبی نے آخر میں تاکید کرتے ہوئے کہا: ہم دشمن کے ہر ممکنہ منظرنامے کے لیے تیار ہیں اور دشمن جس بھی میدان میں کارروائی کرنا چاہے گا، ہم یقینی طور پر دشمن کو منہ توڑ جواب دیں گے۔
