پائیدار سلامتی کا تسلسل، عوام کے درمیان موجود قانون نافذ کرنے والے اداروں کی طاقتور موجودگی کے ساتھ مشروط ہے، حجت الاسلام طائب

دفاع پریس کے دفاعی اور سیکیورٹی گروپ کے مطابق، بسیجِ مستضعفین آرگنائزیشن کے سربراہ حجت الاسلام والمسلمین طائب نے ہفتۂ انتظامیہ کے آغاز کے موقع پر ایک پیغام جاری کیا۔

پیغام کا متن درج ذیل ہے:

بسم اللہ الرحمن الرحیم

ہفتۂِ انتظامیہ اُن غیرت مند مردوں اور خواتین کی انتھک جدوجہد اور مخلصانہ کوششوں کو خراجِ تحسین پیش کرنے کا موقع ہے جو عوام کی سلامتی، سکون اور آسائش کو یقینی بنانے کے لیے عوامی نظم و ضبط کی حفاظت اور معاشرے کی سلامتی کے تحفظ کی بھاری ذمہ داری اپنے کندھوں پر اٹھائے ہوئے ہیں۔

اسلامی جمہوریہ ایران کی قانون نافذ کرنے والی کمان نے انقلابِ اسلامی کی کامیابی کے بعد کے برسوں میں جہادی جذبے اور اخلاص سے سرشار اہلکاروں کی جنگی اور دفاعی صلاحیتوں کے بل پر، مختلف میدانوں میں ذمہ دارانہ اور قربانیوں سے بھرپور موجودگی کے ذریعے خطروں اور بدامنی کا مقابلہ کرنے سے لے کر عوام کو خدمات فراہم کرنے تک، ملک کی سلامتی کو مستحکم کرنے میں مؤثر کردار ادا کیا ہے، بالخصوص ہمارے عزیز وطن کی سرحدوں کی سلامتی کے تحفظ میں۔ ان اہلکاروں نے اپنی جانوں کا نذرانہ پیش کر کے اسلامی ایران کی قابلِ فخر تاریخ میں ایثار اور قربانی کے روشن باب بھی رقم کیے ہیں۔

آج جب ایران کے دشمن جدید ہائبرڈ جنگی طریقوں سے فائدہ اٹھاتے ہوئے ملک کی سلامتی، اتحاد اور سماجی ہم آہنگی کو نشانہ بنا رہے ہیں تو تمام ذمہ دار اداروں اور عوام میں سے ہر فرد کی ہوشیاری، باہمی یکجہتی اور ہم آہنگی کی ضرورت پہلے سے کہیں زیادہ بڑھ گئی ہے۔ بلاشبہ پائیدار سلامتی کا تسلسل عوام کے درمیان قانون نافذ کرنے والے اداروں کی طاقتور موجودگی، معاشرے اور سیکیورٹی کے محافظوں کے درمیان تعلق مضبوط بنانے اور ان محافظوں کی حمایت سے مشروط ہے۔

میں قانون نافذ کرنے والے اداروں کے بلند مرتبہ شہداء اور ملک کی سلامتی اور اقتدار کے تمام شہدا کی یاد کو خراجِ عقیدت پیش کرتے ہوئے ہفتۂ انتظامیہ کے آغاز پر اسلامی جمہوریہ ایران کی قانون نافذ کرنے والی کمان کے کمانڈرز، افسران، نان کمیشنڈ افسران، اہلکاروں اور ان کے صابر اقر قربانی دینے والے خاندانوں کو مبارک باد پیش کرتا ہوں۔ میں ان عزیزوں کی شب و روز جاری جدوجہد پر ان کا شکریہ ادا کرتا ہوں اور بارگاہِ خداوندِ متعال سے شریف ایرانی قوم کی خدمت اور انقلابِ اسلامی کے امامین کے مقاصد کی تکمیل کی راہ میں سیکیورٹی کے میدان کے ان مجاہدین کے لیے سربلندی، عزت اور مزید کامیابیوں کی دعا کرتا ہوں۔

سربراہ بسیجِ مستضعفین