امریکہ کی پالیسیاں احمقانہ ہیں صدر ٹرمپ کا اعتراف

مقدس دفاع نیوز ایجنسی کی بین الاقوامی رپورٹر رپورٹ کے مطابق امریکی صدر ڈونلڈ ٹرمپ نے سماجی رابطے کی ویب سائٹ ٹوئٹر پر اپنی ایک ٹوئٹ میں کہا ہے کہ امریکا کے تجارتی سودے اور پالیسیاں بے وقوفانہ ہیں جن کی وجہ سے امریکا کو سالانہ 800 ارب ڈالر تجارتی خسارہ ہو رہا ہے، امریکی اپنی ملازمتیں اور دولت دوسرے ملک کے شہریوں کو دے رہے ہیں اس طرح دوسرے ممالک نے تو امریکا سے فائدے اٹھائے لیکن خود امریکا خسارے میں جا رہا ہے۔

امریکی صدر نے مزید کہا کہ اس پالیسی کی وجہ سے دوسرے ممالک ہم پر ہنستے ہیں کہ امریکی لیڈر کتنے بے وقوف ہیں تاہم اب مزید یہ پالیسی جاری نہیں رکھی جا سکتی، امریکی قیادت اب اپنے مفاد کو مد نظر رکھتے ہوئے پالیسی مرتب کرے گی۔

واضح رہے کہ ڈونلڈ ٹرمپ اپنے متنازع بیانات اور سخت موقف کے باعث امریکی تاریخ کے متنازع ترین صدر ثابت ہوئے ہیں، انتخابی مہم سے پالیسیاں تبدیل کرنے تک ٹرمپ کو خود اپنے شہریوں، سیاسی قیادت اور میڈیا کی تنقید کا سامنا رہا ہے اور اس حالیہ بیان نے امریکا میں ملازمت اور کاروبار کرنے والے غیر ملکیوں میں تشویش کی لہر دوڑا دی ہے۔